Detaje të reja kanë dalë në dritë nga sekuestrimi i 1.3 ton kokainë në Maqedoninë e Veriut. Destinacioni i lëndës narkotike mësohet se ishte Sllovenia. Tre persona janë arrestuar deri tani, por identietet e tyre ende nuk dihen. Vlera e kokainës nëse do të dilte në treg, kap vlerën 300 mln euro.
Fillimisht kokaina e ardhur nga Amerika Latine, ka kaluar në Bar, Mal i Zi, dhe dje u fut në Shqipëri në pikën e kalimit kufitar të Hanit të Hotit e më pas drejt Qafë Thanës duke përfunduar në Maqedoninë e Veriut, aty ku u kap, para se të mbërrinte në destinacionin final, Slloveni, transmeton Mapo. Mësohet se kokaina ndodhej në një kamion me banane.
Në operacionin policor janë përfshirë DEA Amerikane, Guarda di Finanza dhe policia shqiptare. Lënda narkorike u sekuestrua në një magazinë frutash në Krushopek të Maqedonisë. Në prangat e policisë kanë përfunduar një magazinier dhe dy shoferë, të cilët ndodheshin tek magazina në momentet kur u zhvillua operacioni.
