Kursi i këmbimit duket se është stabilizuar gjatë ditës së sotme, pas luhatjeve te forta në tregun vendas. Sipas kursit zyrtar të Bankës së Shqipërisë një euro është këmbyer sot në kuotën e 126.11 lekëve, me një rënie të lehtë prej 0.04 pikësh nga dje.
Sipas ekspertëve të tregut euro po ekuilibrohet në tregun vendas, duke u këmbyer në nivelin real. Aktorët i argumentojnë luhatjet e forta me efektin psikologjik që dha deklarata e Guvernatorit të Bankës së Shqipërisë se do të ndërhynin në treg për të frenuar rënien e më tejshme të monedhës euro.
Ndërsa dollari amerikan ka vijuar të zhvlerësohet më tej në tregun vendas. Një dollar është këmbyer sot sipas Bankës së Shqipërisë në nivelin e 106.7 lekëve, rreth 0.63 pikë më pak se një ditë më parë.
Ekspertet presin qe ardhjen e turistëve nga trevat me përfundimin e muajin të Ramazanit, oferta në valutë do të rritet shkruan Monitor.al.
Ndërkohë edhe agjencitë e këmbimit valutor duken më të relaksuara duke qenë se kanë ngushtuar diferencën midis çmimit të blerjes dhe të shitjes së valutave, nga 1-2 lekë që ishte një ditë më parë, në pak se një lek sot.
Ekspertët shprehen se është ende herët për të folur për tendencën e këmbimit euro/lekë, duke qenë se mbetet për tu parë reagimi i tregut në javët në vijim.
Banka e Shqipërisë deklaroi më herët se do të ndërhyjë në treg duke tërhequr valutën e tepërt, por ende nuk dihet sa është shumë që do të tërheqë dhe kur do të kryhen këto operacione monetare.
