Kryeministri Edi Rama ka nisur lëvizjet për ndryshime në qeveri. Pas vendimit për të mbledhur Asamblenë e PS në muajin shtator, kreu i qeverisë ka vënë dje në rresht të gjithë ministrat, duke ju kërkuar llogari për të gjithçka kanë bërë gjatë 10 muajve në kabinet.
Sipas burimeve, dje Rama ka mbledhur në një takim të gjithë ministrat në ambientet e Pallatit të Brigadave dhe secili ka bërë një bilanc të punës së tij. Pritet që takimi të vijojë edhe gjatë ditës së sotme, pasi kryeministri u ka bërë të ditur ministrave se kërkon një raport të plotë për gjithçka ata kanë realizuar dhe po ashtu do ketë dhe një bilanc të synimeve që nuk janë arritur. Pas përmbylljes së analizës, shefi i qeverisë do të hartojë një raport ku do të përmenden të gjitha arritjet e secilit ministër dhe ky raport do të prezantohet në Asamblenë e PS që do mbahet në shtator. Në bazë dhe të këtij raporti do vendoset fati i shumë emrave.
Duke qenë se Bashkimi Europian vendosi që negociatat të hapen në qershor 2019 dhe kërkon realizimin e disa kushteve, qeveria pritet të pësojë një ndryshim shumë rrënjësor. Flitet se ministrat e emëruar në 2013 do të largohen, ndërsa po ashtu do ketë dhe emra të tjerë që janë kyç në realizmin e kushteve të vendosura nga BE në luftën antikorrupsion dhe ngritjen e organeve të reja të sistemit të drejtësisë. Rama ja u ka bërë më herët të qartë ministrave se kush nuk ka një bilanc pozitiv do të largohet dhe nuk do ketë asnjë tolerim. Një tjetër komponent që do të merret parasysh është dhe turi i bashkëqeverisjes.
Shefi i qeverisë e shtyu deri në fund të korrikut këtë tur dhe në fund të tij do ketë një bilanc të ankesave të qytetarëve. Në bazë të takimeve janë shkarkuar shumë drejtorë, sidomos në Hipoteka e ALUIZNI, por aty ku ka probleme do ketë dhe ministra të shkarkuar. Po ashtu do merren për bazë dhe ankesat në portalin e bashkëqeverisjes, të cilat kanë shkuar në mbi 15 mijë.
Paralajmërimi i Ramës
Gazeta e kishte deklaruar më herët se nëse nuk hapeshin negociatat do ketë ndryshime rrënjësore në qeveri. Diçka e tillë u paralajmërua dhe nga vetë kryeministri në një mbledhje grupi pak ditë pas vendimit të Brukselit. Në mbledhje Rama kërkoi angazhim total nga të gjithë me qëllim përmbushjen e kërkesave të BE dhe për këtë ka thënë se tashmë qeveria duhet të ndezë motorët për të përmbushur detyrimet dhe kjo do sjellë nevojën e ndryshimeve në kabinet. Burimet i thanë gazetës se kryeministri nuk ka pasur asnjë dilemë, duke thënë se disa emra do të duhet të ikin dhe të emërohen persona të tjerë që mund të japin një kontribut akoma dhe më të madh. Kryeministri bëri të ditur se emrat që do ikin dhe ata që do të vijnë do i prezantojë në mbledhjen e Asamblesë, e cila do mbahet në shtator. Gazeta ka mësuar se në këtë Asamble do të flitet dhe për organizimin e PS dhe për zgjedhjet vendor, raporton Sot.
Aty do të ketë një bilanc pune dhe për kryebashkiakët. Më herët Rama shpërndau nga një formular në të gjitha bashkitë e vendit ku socialistët duhet të deklaronin mendimet mbi punën e kryebashkiakëve. Kush ka marrë vlerësime negative nuk do të rikandidohet. Sinjalet janë se shtatori do sjellë riorganizim të gjerë në PS.
