17 punonjës të policisë kufitare në pikën e kalimit në Morinë janë arrestuar me urdhër të SPAK për akuzën e korrupsionit.
Arrestimet vijnë pas operacionit të përbashkët të policisë së Kosovës dhe SPAK, mbi bazën e një hetimi 1-vjeçar mbi dyshimet për shpërdorim detyre të zyrtarëve në pikën e kalimit kufitar mes Shqipërisë dhe Kosovës.
SPAK njofton se është vendosur masa e sigurisë për 34 punonjës të doganës së Morinës, nga të cilët 32 punonjës policie; 17 janë lënë në burg, 14 në arrest shtëpie dhe për 3 punonjës policie është vendosur pezullimi nga detyra.
“Nga hetimi janë dokumentuar 312 episode të veprimeve korruptive të punonjësve të policisë të cilët favorizonin persona të ndryshëm për futjen e mallrave kontrabandë; persona që trafikonin automjete, sende të tjera të kundërligjshme; ndihmonin për të kaluar kufirin persona të ndryshëm me problematika ligjore për hyrjen dhe daljen e tyre ne vendet e BE-së, sa i përket regjistrimeve fiktive për hyrjen dhe daljen në territorin shqiptar; si dhe ndihmonin persona të tjerë që kishin probleme me ligjin, të cilët nuk regjistroheshin në sistemin TIMS, pasi nuk lejohej udhëtimi i tyre për në Kosovë dhe anasjelltas”, njofton SPAK.
