Sot opozita mban protestën e radhës në orën 10:00 para Kuvendit. Paralelisht me protestën do të nisë dhe seanca plenare.
Seanca nis me pyetje drejtuar ministres së Shëndetësisë dhe Mbrojtjes Sociale, Ogerta Manastirliu, nga deputeti i Partisë Demokratike, Zef Hila, lidhur me disa problematika te evidentuara nga banorët e zonës për menaxhimin e Qendrës Sociale për të Moshuar “Besa”, në Barbullush, bashkia Vau Dejës.
Kuvendi do të shqyrtojë edhe projektvendimin “Për zgjatjen e afatit të veprimtarisë së Komisionit të Posaçëm Parlamentar për Realizimin e Reformës zgjedhore”.
Ditën e mërkurë deputetët mbështetes të zotit Berisha kanë depozituar një kërkesë në Kuvend për ndryshim e rendit të ditës, ku kërkojnë që si pikë e parë të jetë çështja McGonigal.
Të martën Socialistët bënë përjashtimin e radhës të deputetëve demokratë në sekretariatin e etikës. çka do të thotë se sot do të mungojnë në séancë edhe 6 deputetë. Ndëshkimin më të fortë me përjashtim 10 ditor e morën deputetet Edmond Spaho, Oerd Bylykbashi, Sorina Koti dhe Elda Hoti Masën.
Mbledhja u zhvillua me dyer të mbyllura, por deputeti Spaho përdori rrjetet e tij sociale për të treguar se do të bënte të njëjtën gjë si në seancën e shkuar pavarësisht masave të socialistëve.
Me pezullim u ndëshkuan edhe dy deputete demokrate, respektivisht Greta Bardeli me 3 ditë dhe Lindita Metaliaj me 5 ditë.
