Ministri i Brendshëm Xhafaj, sot në mesditë përmes një postim në Twitter e komentoi aksionin e kapjes së 600 kilogramëve drogë në Durrës si sukses të punës së autoriteteve shqiptare në bashkëpunim me partnerët e huaj. Ai shkruan:
Një superaksion i Policisë së Shtetit në bashkëpunim me agjencitë e tjera ligjzbatuese vendase dhe të huaja.Goditje e fortë trafikut ndërkombëtar të drogës!Hetimi vazhdon!Forca e Ligjit, forca e shtetit po vepron. Pas pak detajet nga policia e shtetit në një konferencë për shtyp.
Por, deklaratat e ministrit janë kundërshtuar nga deklaratat e policisë së shtetit. Kjo e fundit në një reagim pas sulmeve të kryetarit të opozitës Lulzim Basha shprehet se operacioni i kapjes së drogës është kryer nga autoritetet vendase.
“Ky operacion është një sukses i padiskutueshëm i agjencive ligjzbatuese shqiptare, që është finalizuar falë bashkëpunimit intensiv me Hetimin Doganor dhe Prokurorinë e Krimeve të Rënda. Në këtë rast, i gjithë operacioni nga fillimi në fund është kryer pa asnjë përfshirje të partnerëve tanë ndërkombëtarë” — shkruhet në njoftimin e policisë së Shtetit.
Sot në portin e Durrësit, policia kapi rreth 600 kilogramë kokainë të fshehur në një ngarkesë me banane të porositura në Kolombi nga firma shqiptare “Arbi Garden”.
/exit.al/
