Ashtu si në Shkodër, Partizani tregon karakter edhe njëherë tjetër në një ndeshje transferte. Kësaj here të kuqtë fituan 1-4 në Durrës përballë Teutës, duke mbajtur kreun e renditjes në mbyllje të fazës së parë.
Kryeqytetasit e nisën shumë mirë takimin, duke shënuar që në minutën e dytë me Hotin, që nuk fal me të djathtën. Megjithatë, Gruda në minutën e 16-të barazon sfidën. Partizani nuk stepet dhe në të 22-n kalon sërish në avantazh me anë të Da Silvës.
Të kuqtë marrin zemër dhe në minutën e 34-t realizojnë edhe golin e tretë. Është sërish Hoti që ndëshkon durrsakët me të djathtën e tij. Pjesa e parë përfundoi 1-3. Në të dytën do të ishte Skuka që do të vriste ndeshjen në minutën e 75-të.
Në ndeshjen tjetër të së premtes, Vllaznia fitoi 2-1 përballë Bylisit. Tri pikë me shumë vlera për shkodranët që e mbyllin fazën e parë në vendet e para. Golin e parë për kuqeblutë e shënoi Herald Marku në minutën e 39-të, ndërsa në të dytën dyfishoi Jonuzi. Ballshiotët ngushtuan në 83’ me Kaçorrin, por pa qenë në gjendje më shumë.
