“Asnjë hap që do të ndërmarrë Türkiye nuk i nënshtrohet lejes apo pëlqimit të askujt”, theksoi shefi i Komunikimeve Fahrettin Altun
Vetë Türkiye do të vendosë se kur mund të nisë një operacion të ri antiterrorist në veri të Sirisë, përtej kufirit, tha drejtori i Komunikimeve i Presidencës së vendit, Fahrettin Altun, transmeton Anadolu Agency (AA).
Terroristët e PKK/YPG-së po sulmojnë ushtarët turq dhe sirianë që jetojnë në zonat e kontrolluara nga Türkiye pranë kufirit, tha Altun i pyetur nga e përditshmja norvegjeze Aftenposten se kur vendi do të nisë një operacion në veri të Sirisë.
“Mund të ketë qasje të ndryshme lidhur me krizën në terren. Megjithatë, ne besojmë se lufta kundër terrorizmit është emëruesi i përbashkët i të gjitha shteteve që duan paqe dhe stabilitet në rajon”, tha Altun.
Nën udhëheqjen e presidentit Recep Tayyip Erdoğan, Türkiye është bërë një shtet që vendos interesat e veta në qendër, shtoi ai.
“Sigurisht, ka disa shkëmbime idesh midis shteteve. Megjithatë, në fund të fundit, asnjë hap që do të ndërmarrë Türkiye nuk i nënshtrohet lejes apo pëlqimit të askujt”, theksoi ai.
I pyetur nëse Türkiye ka nevojë për mbështetjen e autoriteteve ruse për operacionin, Altun tha se marrëdhëniet turko-ruse kanë një “histori të rrënjosur thellë” dhe janë “jashtëzakonisht realiste”.
Që nga viti 2016, Ankaraja ka nisur tre operacione të suksesshme antiterroriste përtej kufirit të saj në veri të Sirisë për të parandaluar formimin e një korridori terrorist dhe për të mundësuar kthimin paqësor të banorëve: Mburoja e Eufratit (2016), Dega e Ullirit (2018) dhe Burimi i Paqes (2019).
Aplikimet e Suedisë dhe Finlandës për anëtarësim në NATO
Në lidhje me kundërshtimin e Türkiye-s ndaj synimit të Finlandës dhe Suedisë për anëtarësim në NATO, Altun tha: “Nëse jemi të bindur se ata i mbajnë premtimet e tyre, anëtarësimi i tyre do të miratohet. Tani për tani, parlamenti turk nuk është në seancë, kështu që nuk mund të flasim për një datë konkrete (për të votuar për aplikimet e tyre).
Këtë qershor, Türkiye, Finlanda dhe Suedia nënshkruan një memorandum mbi aplikimin e vendeve nordike për anëtarësim në NATO pas bisedimeve katërpalëshe në Madrid.
Memorandumi i detyron Finlandën dhe Suedinë të ndërmarrin hapa për shqetësimet e sigurisë së Türkiye-s, duke përfshirë ekstradimin e të dyshuarve për terrorizëm, dhe të heqin embargon e armëve ndaj Ankarasë.
Për t’u bashkuar me NATO-n, një hap që vendet ndërmorën pasi Rusia filloi luftën e saj kundër Ukrainës, Suedia dhe Finlanda kanë nevojë për pëlqimin e të gjithë anëtarëve aktualë të aleancës, duke përfshirë Türkiye-n, anëtare prej mbi 70 vjetësh.
